د گمرکونو او عوايدو معين سره د ننگرهار ولایت د سوداگرو غونډه
20 اسد 1401
۱۳ محرم الحرام ۱۴۴۴/ ۲۰ زمری ۱۴۰۱
د ماليې وزارت د گمرکونو او عوايدو معين ښاغلي الحاج ملا محمد ناصر اخند تر رهبرۍ لاندې چې د عوايدو لوی رئيس ښاغلی الحاج معراج محمد معراج او د گمرکونو لوی رئيس ښاغلی مفتي عبدالمتين سعيد هم حاضر وو، د ننگرهار د صنعت او سوداگرۍ خونې له استازيو او سوداگرو سره د گمرکونو او عوايدو معينيت د غونډو په تالار کې غونډه وکړه.
په دغې غونډې کې د یادې خونې استازیو د گمرکاتو او مالیاتو اړوند خپلې ستونزې د گمرکونو او عوايدو معين ښاغلي الحاج ملا محمد ناصر اخند سره سره شریکې کړې او د مالیاتو اړوند د بررسۍ په طرزالعمل کې يې د اسانتیاؤ د راوستلو غوښتنه وکړه.
ورپسې د عوايدو لوی رئيس ښاغلي الحاج معراج محمد معراج د ننگرهار ولایت د صنعت او سوداگرۍ خونې راغلیو استازیو ته وویل: په مالیاتي سیسټمونو کې د اسانتیاؤ راوستل زموږ کاري لومړیټوب گڼل کېږي او د بررسۍ په برخې کې د هر راز اسانتیاؤ د راوستلو له پاره به لا ډېرې جدي هڅې وشي.
غونډه د دوه اړخيزې بشپړې همکارۍ د ډاډ د ژمنو په ورکولو سره پای ته ورسېده.