الحاج مولوي سفر محمد سحر د مولوي سید محمد زوی، د ۱۳۵۵ هجري لمریز کال د میزان پر درېیمه نېټه د غزني ولایت د ناوې ولسوالۍ د ببرکلي په یوې دینداره، جهادي او علم پروره کورنۍ کي زېږېدلی دئ
زده کړي:
لومړنۍ زده کړي ئې په خپل کور کي د خپل پلار تر څارني لاندي او ثانوي زده کړي ئې د کندهار په جهادیه مدرسه کي بشپړي کړي. د اسلامي زده کړو د وړې دورې له پاره کوېټې ته ولاړ او د مفتي عبدالرازق صاحب تر لارښووني لاندي ئې خپلي زده کړي یاده دوره بشپړه کړه. د لوې دورې لپاره ئې د کوېټې په پښتون آباد سیمه کي د حافظ فضل صاحب مدرسه وټاکله او خپله لویه دوره ئې همالته ترسره کړه.
جهادي خدمتونه:
مولوي سفر محمد سحر د یوې جهادي کورنۍ د غړي په توګه د مولوي محمود صاحب او ملا محمد ناصر اخند تر قوماندې لاندي په جبل السراج، کندز او تخار کي د جهاد په لیکو کي اوږد مهاله فعالیتونه ترسره کړي دي.
د اسلامي امارت د لومړۍ دورې دنده:
• د حمل او نقل ریاست په وړاندیز او د ریاستالوزراء عالي مقام په حکم د ټرانسپورټ او هوانوردۍ وزارت د خصوصي سکتور د ریاست اداري مرستیال.
د شل کلني مبارزې پر مهال مسؤلیتونه:
• د غزني ولایت د ناوې ولسوالۍ ملکي ولسوال.
• د شلګر او ګیلان ولسوالیو نظامي ولسوال.
• د پکتیکا د ولایتي کمیسیون غړی.
• په اقتصادي کمیسیون کي بېلابېلې دندي، په ځانګړي ډول د بغلان ولایت د چشمه شیر ګمرک مسؤلیت، چي یاد ګمرک د کابل او شمالي ولایتونو د اکمالاتو مهمه لاره وه.
د اسلامي امارت د دوهمي دورې پرمهال دندي
• د کندز ولایت د ګمرک رئیس.
• د بلخ ولایت د حیرتان بندر د ګمرک رئیس.
• د کندهار ولایت د ګمرک رئیس.
اوسنی مسؤلیت:
الحاج مولوي سفر محمد سحر د ۱۴۴۷/۲/۲۲ نېټې د ریاستالوزراء عالي مقام د حکم له مخي د عوایدو لوی رئیس وټاکل سو او د ۱۴۰۴/۶/۴ نېټه رسماً خپلي دندي ته پیل وکړ.
ځانګړتیاوي
نوموړی د خپل اخلاص، امانت، تجربې او رهبري وړتیا له امله د اسلامي امارت له مشرانو د ځانګړي پاملرني او باور څښتن دئ.