د وږي ۴مه، ۱۴۰۴ هـ.ل
د مالیې وزارت په وړاندیز او د ریاست الوزراء عالي مقام د ۱۱۴۱ ګڼه (۱۴۴۷/۲/۲۲) نېټه حکم پر بنسټ؛ ملا صفر محمد سحر د عوایدو لوی ریاست د نوي رئیس په توګه ټاکل سوی وو، چي نن د عوایدو او ګمرکونو معین له لوري د یاد معینیت کارکوونکو ته ور وپېژندل سو.
د معرفت غونډه د عوایدو او ګمرکونو معینیت د غونډو په تالار کي، د عوایدو او ګمرکونو معین، او اړونده ریاستونو د رهبري هیئت په شتون کي ترسره سوه.
د عوایدو او ګمرکونو معین الحاج مفتي عبدالمتین سعید د معرفت پر وخت نوي ټاکل سوي رئیس ته په چارو کي د بریالیتوب هیله څرګنده کړه او رهبري هیئت ته ئې سپارښتنه وکړه، ترڅو له نوي رئیس سره په هره برخه کي لازمه همکاري وکړي.
ملا صفر محمد سحر د معرفت په غونډه کي د مالیې وزارت له رهبرۍ څخه مننه وکړه، چي پر نوموړي ئې د یاد مسؤلیت د ترسره کولو باور وکړ. نوموړي زیاته کړه، چي د رهبرۍ اطاعت پر ټولو لازم دئ او د همدې اصل پر بنسټ به چاري پر مخ یوسو. همدارنګه ئې له ټولو ګډونوالو څخه د چارو په بریالي ترسره کولو کي د همکارۍ غوښتنه وکړه.
یادونه باید وسي، چي ملا صفر محمد سحر تر دې مخکي د کندهار د ګمرک د ریاست مسؤلیت په غاړه درلود.