د زمري، ۱۸مه، ۱۴۰۴
د عوایدو او ګمرکونو معینیت د غونډو په تالار کي د معین الحاج مفتي عبدالمتین سعید په مشرۍ، د اړوندو ریاستونو د رئیسانو او مرستیالانو په ګډون د روان کال د همغږۍ دوهمه ناسته ترسره سوه.
په پیل کي معین صاحب ګډونوالو ته د چارو د ښه والي، د ملي عوایدو د زیاتوالي، مالیه ورکوونکو او تجارانو ته په مالي او ګمرکي چارو کي د لا آسانتیاوو د رامنځته کولو په موخه اړیني لارښووني وکړې. نوموړي وویل:
((موږ ټولو ته درانه مسؤلیتونه سپارل سوي دي؛ باید خپلو دندو ته متوجه اوسو، نظریات او تجربې له یو بل سره شریکي کړو، تر څو خپل ټاکلي اهداف په مؤثره توګه ترلاسه کړو)).
د ناستي په جریان کي د عوایدو او ګمرکونو لویو ریاستونو اړوند پر مهمو موضوعاتو بحث وسو. د لومړۍ ناستي پر مهال ټاکل سوي هیئت راپور وړاندي کړ، چي د ځینو موضوعاتو د څار او د حل لاري پکښي شاملي وې. همدارنګه د ځینو ستونزو د اساسي حل له پاره نوی هیئت وټاکل سو، ترڅو راتلونکي ناستي ته د دې موضوعاتو د حل وړاندیزونه وړاندي کړي.
په ناسته کي د کارګو شرکتونو د بررسۍ څرنګوالی، د ترانزیټي او بارچالاني شرکتونو په پاتي پورونو، او همدارنګه په هغو سیمو کي، چي بانکونه شتون نلري د مالیې د راټولولو پر لارو چارو خبري وسوې او په اړه ئې اړیني پریکړي وسوې.
دغه ناسته د عوایدو او ګمرکونو د عمومي ریاستونو ترمنځ د همکارۍ د پیاوړتیا او د خدمتونو د ښه والي په موخه جوړه سوه، چي ورته ناستي به په راتلوونکي کي جوړي سي.